Na muamua mu nofoa a o lei mu le pito i luga o le Loafers Lodge i Ueligitone.
A o faasolo pea suesuega a leoleo i le mafuaaga o le mu tele i Ueligitone ananafi ua ma’umau ai soifua o le toaono ae o loo sailia pea nisi, o molimau nei a nisi e nonofo ai.
Ua lipotia e le Stuff nisi o molimau o le mu muamua o le nofoa pe tusa lea o le sefulu i le po o le Aso Gafua ma ‘e’e ai le alarm ma o lea na omai ai i fafo ma le fale.
Na uma lea toe foi i totonu mulimuli ai toe tupu le isi mu lona lua.
E le o mafai ona faamautinoa mai e le ofisa o leoleo lipoti o lea na faalua ona mu le Loafers Lodge i le po o le Aso Gafua, ma le faamatalaga o loo faaaoga uma molimau nei i suesuega o loo faia.
E ui la e le o tele se tala mai leoleo i molimau nei, pau le lipoti a le ofisa o tineimu ua tuuina mai o le mu ananafi o loo iai i se tulaga masalomia.
E oo mai i le taeao nei o loo tumau lava le fuainumera o tino maliliu na maua i totonu o le fale ma o se taimi o le asō o le a mafai ai ona asia e leoleo totonu o le fale mo suesuega.
Ae mo i latou o loo fia fesoasoani i tagata ua aafia o lea ua iai le mayoral relief fund faapitoa mo tagata o le Loafers Lodge, ma e oo mai i le taeao nei ua ausia le $70,000 o foai tupe.
