O le faamalieina o aiaiga ua faataoto mo le poloketi tasi le miliona tala mo itumalo faapalota e 51 o le atunuu, ua faamatuu atu ai vaegatupe tai 150 afe mo itumalo e lima ua mae’a tuuina atu lipoti ma faamatalaga o tupe o le 200 afe na faamatuu muamua, ua mae’a ona sueina e suetusi.

O le itumalo o Faleata 4, Lotofaga, Salega 2, Vaa o Fonoti, ma Gagaifomauga 2. Faaalia e le Minisita o Tupe i le sainia o maliega ma ia itumalo palota, ua faamalieina aiaiga ua tausisia e ia itumalo ma o le mafuaaga foi lea ua faamatuu iai le vaegatupe muamua o le tasi le miliona mo le tausaga faaletupe o loo faagasolo lea e mae’a i le faaiuga o le masina o Iuni o le tausaga nei.

Ua 35 itumalo palota ua mae’a tauaao le vaegatupe muamua o le miliona muamua e 150 afe, ae 16 itumalo o loo faatali le taimi e maua ai pe a mae’a ona tuuina atu lipoti o le sueina o faamatalaga tau tupe i le faaaogaina o le 200 afe na faamatuu muamua.

E valu itumalo ua faamatuu iai le tai $420,000 tala.