O otaota o manu, o toega o taumafa ma isi otaota lafoai e mafai ona gaosia ai le kesi e ola ai ogaumu mo le gasesega o taumafa, o se faamāmā avega lea mo aiga e lima o le afioaga o Faleaseela uta ma tai, ua amata faaaoga i se fesoasoani e maua ai le kesi ogaumu e le alu ai se tupe e faatau ai.
O le sosaiete poo le faalapotopotoga a le afioaga ua faaigoaina o le “Saili Manuia o Aiga Taeao”, ua lua nei tausaga talu ona faavae ma o se sosaiete ua iai sui o le aufaifaatoaga a Faleaseela i Lefaga.
Ua latou gagau le vao ma atiina a’e faatoaga, ma lafumanu mo le manuia o aiga, ae o lea ua oo atu le sailiga manuia mo aiga o le nuu, a le faalapotopotoga i le faatuina o nofoaga e gaosia ai le kesi ogaumu mai otaota o manu ma otaota lafoai, o le isi lea o matati’a ua latou ausia ua fesoasoani ai i le tau faasoa o seleni, aemaise o nei aso ua taugata lava le kesi ogaumu o loo faatau mai i kamupani o loo maua ai lea auaunaga.
O le fesoasoani a le faalapotopotoga o le UNDP, faatasi ai ma le galulue faatasi ma le matagaluega o faatoaga ma faigafaiva, faapea le matagaluega o puna’oa faalenatura ma le siosiomaga, ua mafai ai ona faatutū nofoaga mo aiga e lima o lea afioaga, ua amata faaaoga nei e maua ai le kesi ogaumu e aunoa ma le toe alu ai o se tupe.
Ni finagalo faaalia e ala i ni faatalatalanoaga ma nisi o matai o aiga o Faleaseela tai ma Faleaseela uta i Lefaga le tofa Tusa Moana o le sui taitaifono o le sosaiete o le Saili Manuia o Aiga Taeao, ma le susuga Fereti Tuna o se tasi o sui o le sosaiete.
E 40 afe tala Amerika le fesoasoani a le UNDP na fausia ai nofoaga e gaosia ai le kesi ogaumu mo aiga e lima o Faleaseela Lefaga, ae o le polokalame lenei e fitu nuu o loo faatino ai, e ono i Upolu ma le tasi i Savaii.
O nuu ia e aofia ai Vaisala, Faleaseela, Tuaefu ma Ululoloa, Vailuutai, Tanumapua, Lotofagā Safata, ma Matanofo i Falelatai.
