O se tala faanoanoa ua lipotia i le 9News i le asō e faatatau i si tamaitai mai Brisbane na uma lona soifua a o faatalitali mo le taavale a le falemai i le silia ma le itula ma le afā.
O le tina e suafa ia Cath Groom 51 tausaga na valaau i le triple 0 mo se fesoasoani ina ua faalogoina le tiga o lona fatafata i le tea o le 10 i le po o le Aso Faraile talu ai.
Sa faailoa foi o loo matuai manaomia vave lava se fesoasoani, peitai fai mai e silia ma le 90 minute o faatali pea mo le taavale e lei toe alu ane lava.
Na toe faaleaogaina e le tina le taavale e tusa lea ua lata i le vaeluaga o le po o le aso lava lea ma fai loa sana malologa ma le faamoemoe e agai i le falemai i le aso e sosoo ai.
Peitai o le tala faanoanoa e maua atu si tina lea i le taeao na sosoo ai i le tea o le 9 i le taeao ua maliu, na maua e si ona atalii.
I se faamatalaga mai le Queensland Ambulance Service o le taimi tonu lea na valaau atu ai le tina o loo fai si pisi ma faia foi se iloiloga.
O loo faatino nei le suesuega i lenei mataupu.
