Ua faailoa e le Minisita o Tupe, Afioga Lautimuia Uelese Vaai, le tulaga faafiafiaina o le faletupe o le lalolagi i le palasi o aitalafu a Samoa mai le 50 pasene sa iai o le tamaoaiga i le 35 pasene.
O le faaitiitia o aitalafu a le Malo o Samoa ua toe matala mai ai le faitotoa mo ni nonogatupe, peitai ua faaalia e le minisita i le polokalame o le Soalepule a le TV2, e lē tatau ona vavevave i le faia o nisi aitalafu, ae ia mataitu lelei poo ā atinae e tatau ona ave iai le faamuamua mo le manuia o tagata, ma ia sa’o ma fetaui foi le taimi e faia ai.
O se finagalo o le Minisita o Tupe ua o se fagufagu tāua i le faigamalo, ina ia lē toe faaluaina le mau aitalafu sa iai, aemaise le faafoeina ma le pulea o le kamupani vaalele a le atunuu na sili ona tele ai aitalafu e totogi.
Ua faaalia e Lautimuia o le vaalele e tatau ona toe silasila iai le Malo auā o se atinae tāua mo tagata tafafao aemaise e sao ai le leo o le Malo i le fetuunaiga o tau o pasese ina ia maua e tagata malaga o le atunuu se faamāmā avega.
Se finagalo o le Minisita o Tupe i le polokalame o le Soalepule, le afioga Lautimuia Uelese Vaai.
