A o faagasolo le faatalanoaina o le fuafuaga o se inisiua totogi mo togafitiga faafoma’i i le faama’ite a le faalapotopotoga o le faaputuga tupe o le lumanai manuia o tagata le NPF, ua faailoa e le ta’ita’ifono o le Komiti Faafoe o lea faalapotopotoga tau tupe a le malo, e leai se isi tupe e faaopoopo i le saofaga o loo totogi e le tagata faigaluega ma le fale faigaluega i le taimi nei i le NPF, pe afai ae faatino lea fuafuaga.
Ua faailoa e le ta’ita’ifono le susuga Papalii Panoa Tavita Moala i se talanoaga ma le polokalame i se leitio Samoa i Amerika, le Siufofoga o le Taeao Fou, o le 20 pasene lea o loo totogi i le taimi nei e le fai saofaga e pei ona ta’i 10 pasene ai le tagata faisaofaga ma le fale faigaluega, ua na’o le 6 pasene e aveese mai ai mo le inisiua o togafitiga poo le Medicare Insurance Scheme.
O le Aso Toonai sa faia ai faatalanoaga i Salelologa i Savaii ae ua faailoa e le ta’ita’ifono i lea polokalame o le a feiloai foi ma le faalapotopotoga o tagata faipisinisi a le atunuu le Samoa Chamber of Commerce faapea le faalapotopotoga o le augaosi oloa le Samoa Manufacturers Enterprises poo le SAME.
O itutino tuma’oti ia e lua o loo faafaigaluegaina le to’atele o o tatou tagata ia latou pisinisi lea o loo totogiina le isi 10 pasene o le saofaga.
Le susuga Papalii Panoa Tavita Moala i se talanoaga ma le susuga Tuilaepa Faafetai Su’a o le polokalame o le siufofoga o le taeao fou.
O le fesiligia e nisi o le tulaga pe faapefea pe a uma le saefulu tausaga e lē gasegase lava le tagata o loo totogi le inisiua, ae ua tali le ta’ita’ifono, e lē toe maua le seleni ona o aiaiga ia o tulafono tau inisiua.
O le au penisione i Samoa e mafai ona auai i le inisiua o togafitiga faafoma’i, i le totogi o lona sao tau tupe e 300 tala i le tausaga.
O le au faisaofaga e mafai ona ia totogi ai i lana inisiua ma seleni mo nisi e to’atolu o lona aiga, e pei o fanau poo nisi lava tagata o le aiga e aofia ai mātua.
O le faamalosia o le au faisaofaga uma o le NPF e totogi le inisiua o togafitiga faafoma’i, ua faaalia e Papalii o se aiaiga o le tulafono na pasia e le Palemene i le tausaga e 2005, lea ua mae’a ona saini ai le Ao o le Malo ia Aperila o lea lava tausaga.
O le fuafuaga lenei pe a faatino o le a faia ai ni teuteuga i le tulafono o le faalapotopotoga o taui o faalavelave faafuase’i e avanoa ai ona fesoasoani lea faalapotopotoga i le faatupeina o le inisiua o togafitiga faafoma’i.
