O se tasi o koneseti pese o loo olioli atu iai lo tatou atunuu i le taimi o le faamanatuina o le 61 tausaga o le Tutoatasi, i le masina fou o Iuni, ua faaigoaina o le Motherland Samoa cultural music festival, o le a faafofoga ma silasila ai Samoa i nisi o ana tamafanau mai atunuu mamao e talenia i le musika.
Ua faailoa aloaia lea fuafuaga e sui o auaunaga o loo faamaopoopoina lea faaaliga o musika faatasi ai ma le Minisita o le Pulega o Tagata Tafafao mai Fafo i se feiloaiga ma tusitala i le amataga o lenei vaiaso.
O se koneseti na faailoa e le Minisita le afioga Toeolesulusulu Cedric Schuster, ua na o laulau mo nisi taualoa o le a totogi, ae o le lautele o le atunuu e ulufua i le faamoemoe lenei o le a faia i le malae o taaloga le Apia Park Stadium.
Le Minisita o le Pulega o Tagata Tafafao mai fafo, afioga Toeolesulusulu Cedric Schuster.
O nisi o tagata pepese lauiloa o le a auai i le koneseti e faia i le aso 3 o Iuni, o HP Boys, Savage, DJ Noiz, Kennyon Brown, Tomorrow People ma Wayno.
O le a pepese ai foi alo iloga o Samoa e pei o Mautoatasi ma Matalena, ma le Pacific Love Band.
