E maua lava le toa selau o tagata na auai i le solo filemu na momoli ai le sainigalima poo le petition i le Malo o Samoa lea na faatino i le Aso Lulu o lenei vaiaso, peitai e leai se sui o le Malo na susū ane e feiloai iai sui o le Samoans for Ceasefire sa tapenaina le savali, ma tauaao iai le sainigalima.
Na faataape se vaega o tagata na auai i le solo sa latou tālia se sui o le Malo ma faailoa iai e se sui o le komiti le tamaitai loia le afioga Mapusua Tanya Toailoa, o le a saili se isi avanoa e feiloai ai i le Malo ma momoli iai le sainigalima.
Le afioga Mapusua Tanya Toailoa o se sui o le komiti o le faalapotopotoga ua ta’ua o le Samoans for Ceasefire sa tapenaina le sainigalima ma le savali filemu i le naunautaiga e saili le lagolago a le Malo e momoli ai le feau i taitai o le Malo o Isaraelu ua tatau ona taofi le taua, ae silasila alofa i soifua ma ola o tagata Palesitina ua fano nisi ae manunu’a isi ona o le taua.
E tasi le afe suafa o tagatanuu Samoa e aofia ai i latou o aumau ma alala i atunuu i fafo na saini o latou suafa e lagolago ai le autu o le savali filemu.
