Ua leai se taotoga faapitoa poo se suesuega o le maliu lilo mo se alii pailate o le kamupani vaalele o le Virgin Australia, lea na maua ua maliu i le taeao o le Aso Sa o le vaiaso ua mavae, i le potu o se faletalimalo i Apia sa faamautu ai.

O le faletalimalo foi lea na faamautu ai ma isi o le auvaa o se tasi o faiga malaga a lea kamupani vaalele sa afea ai Samoa.

Ua faailoa e leoleo o le faaiuga a le pule o maliu poo le coroner ua avanoa ai le auina atu o le tino maliu o le pailate i lona atunuu o Ausetalia mo tapenaga masani o ona sauniga mulimuli.

Ua faailoa lea faaiuga a le pule o maliu, a o tālia ai suesuega a leoleo o loo faagasolo pea i le maliu o se alii kapeteni o se vaa fagota, o se tagatanuu o Niu Sila lea o loo masalomia o loo aafia ai se gaioiga solitulafono. 

A o tatou iai pea i le matagaluega o leoleo, falepuipui ma le toe fuataina, o loo faagasolo suesuega i se solitulafono tau faaoolima na lipotia mai Savaii, ma ua maliu ai se taulealea 22 tausaga lona matua.

Ua faailoa e le komesina o leoleo i se lipoti i le amataga o lenei vaiaso fou, e toatasi se tagata ua taofia e leoleo i Tuasivi ona ua masalomia i le iai o sona aafiaga i le faatinoina o lea solitulafono.