Ua lipotia i le leitio faavaomalo a Niu Sila i le asō se faamatalaga mai le faatonu aoao o le soifua maloloina i Samoa e faapea e le o popole i se isi pepesi o le faamai o le misela i le atunuu e pei ona iai i le 2019, ina ua maua atu iuga o suesuega sa faia e le o faamaonia pe negative.

I le tolu vaiaso talu ai sa mataituina ai e le matagaluega tamaiti o loo masalomia e aafia i le misela ma ua faailoa ai e Aiono Dr Alec Ekeroma o siaki uma o toto sa aveina mai i Niu Sila nei ua toe foi atu e negative uma.

O loo faatalitali nei le matagaluega i nisi o vaega o nei iuga e lei oo atu ae manatu le alii fomai e le taumate o le a negative foi.

Ta’ua e Aiono i le lipoti lea o le pepesi o le misela i le 2019 na maliliu ai le toa 83 i le faatoa mae’a atu foi o le pepesi o lea faamai i Aukilani.

O le taimi nei o lona manatu e le ono iai se pepesiga i Samoa ma e le o pepesi foi le misela i le taimi nei i Ausetalia faapea foi Niu Sila sei vagana le tagata e toatasi na lipotia i Aukilani ma nisi lapataiga o isi malaga mai Ausetalia.

Na faailoa e Ekeroma ua lelei foi le aofai o tuipuipui ua mae’a ona faia lea ua oo atu i le 85 pasene ua mae’a ona faia tuipuipui muamua ma le 45 pasene ua faia tui lona lua, pe a faatusa atu i le 2019. 

Ua mae’a ona tuuina faaaliga e le matagaluega i nofoaga poo centres e faia ai polokalame o tuipuipui ma unaia ai le faia o tui o tamaiti.