O lea ua vavala mai i feutanaiga o loo faia i le va o le komisi o galuega a le Malo ma le asosi o fomai, faapea le pulega o le matagaluega o le soifua maloloina, o le a leai se aafiaga o le tautua masani a fomai a o lumanai le masina fou o Iulai e amata faamamalu ai le faatulagaga fou o totogi ma alauni mo le aufaigaluega e le gata o fomai, o tausi soifua, a o isi tagata faigaluega uma a le matagaluega.

Ua faailoa e le asosi o fomai i le faaiuga o le vaiaso, o le amataga o le masina fou o Iulai e faatino ai le suiga ua malilie iai o le na o le valu lea o itula e galulue ai i le ao, ae malolo le afiafi, o le po ma faaiuga o vaiaso.

Na faia lea maliega a le asosi e tali atu ai i le lē talia e le Komisi o Galuega a le Malo o le latou talosaga mo se siitaga e ala i se faatulagaga fou i o latou totogi.

Peitai o le faaiuga lava o le vaiaso na faailoa ai e le komisi o galuega a le Malo le P.S.C. (Public Service Commission) i se pepa o faamatakaga faalauaitele, o le a totogi itula faasili poo ovataimi e fua i le totogi o loo maua e le fomai poo le normal rate e pei ona faatulaga o le a maua lea faamanuiaga o itula faasili i le totogi e $68,695 tala i le tausaga.

O se tulaga siitia lea e pei ona faailoa e le komisi pe a fua i le faiga tuai sa fua le totogi atu o le itula faasili i le maualuga o le totogi e $18,494 i le tausaga.

O aiaiga masani a le Malo o tagata faigaluega uma e faakonekarate o latou taimi galulue e lē maua ni faamanuiaga tau totogi i ovataimi, peitai o le a faia se alauni e ta’ua o le Responsibility Aallowance mo tagata faigaluega e konekarate i totonu o le auaunaga a le soifua maloloina mai le 30 pasene i le 60 pasene e fuafua i le totogi o loo maua.

O le alauni lea o le a ta aofai uma ai isi alauni sa maua i le taimi o tuu eseese pulega o le matagaluega o le soifua maloloina ma le auaunaga faasoifua maloloina le national health service.

O fomai ma isi tulaga tofi o le matagaluega o loo faakonekarate o le a maua le alauni e 50 i le 60 pasene e fua i le totogi o loo maua e aunoa ma le faaitiitia o le totogi masani o loo maua i le tausaga.

Ma ua faaalia e le Komisi o galuega a le Malo, ua faasa’o ai i le tulaga lea nisi o tala salatua o loo faailoa ai o le a faaitiitia totogi o fomai ma tagata faigaluega sinia o loo faakonekarate.