Ua lē taunuu le fuafuaga mo se tuuga fautasi o le vaiaso o le Teuila ma ua aveesea ai ma le polokalame ua mae’a ona faailoa lautele mai e le pulega o tagata tafafao mai fafo.
Ua faailoa e se ofisa sinia o le pulega e laititi le numera o vaa na tuuina atu mo le lesitala, o le mafuaaga lea ua lē faataunuuina ai.
O nisi o lipoti a o lumanai le faailoaina o le polokalame o le Teuila o lenei tausaga ua faailoa ai le lē mafai e le fautasi o le Tolotolo o Tamauli ona auai ona o nisi o faaletonu ua molimauina i lo latou Sa.
E faapena foi se molimau ua ta’ua ai ni faaletonu i nisi o fautasi e mafua mai i le tuuga o le Tutoatasi ia Iuni.
Mo le silafia e iai seleni sa tuuina atu i kapeteni ma auvaa sa tausinio i lea tuuga e faaleleia ai faaletonu i o latou fautasi, a o lei faataunuuina le tuuga o le Sisigafu’a o le tausaga nei.
