I le 300 afe poo le sili atu foi o vaegatupe sa faatupe ai polokalame ma tapenaga o le vaiaso o le Teuila i tausaga ua tuanai, o le tausaga nei ua na o le 70 afe tala ua faaagaga mo le Teuila.
O polokalame foi sa masani ai ua iai ni suiga, i le leai o ni tauvaga sa masani ai i taaloga faaleaganuu, faapea siva ma pese faaleaganuu, ae ua filifilia ausiva e faafiafia ae maua a latou meaalofa.
O pesepesega faalelotu i le Aso Sa a o lumanai le vaiaso o polokalame eseese, ua lē faatinoina ma nisi o tapenaga masani e mafua ona ua utiuti le faasoa a le Pulega o Tagata Tafafao.
O le feiloa’iga na taloina a tusitala ma sui o le pulega o tagata tafafao na faailoa ai lea suiga i le Teuila o le tausaga nei, e mafua ona o loo faamamafa tapenaga uma i le taligamalo o le Fono a Malo o le Taupulega ia Oketopa.
Le tamaitai Ofisa Sili o le pulega o tagata tafafao, afioga Toleafoa Pativaine Petaia Tevita.
O le Teuila o le tausaga nei lea e faagasolo i le vaiaso atoa o lumanai nei, o le a tapu pe taofia ai ona avatu ni fagupa’u vai i nofoaga o le a faatino ai polokalame uma.
O le mafuaaga o le fia lagolago i taumafaiga e faaitiitia ai otaota lafoa’i e faapitoa i fagupa’u.
O le a iai nofoaga o le a saunia e maua ai le vai auli mamā mo le atunuu, ae lē faatagaina ona avatu ni faguvai, ma e faasā foi ona afea e le au faatau faguvai ma apainu faapea faguinu o loo utuina i fagupa’u.
