A o fesootai pea le malo o Niu Sila faapea Niu Kaletonia i le mafai e aveesea mai ai tagata Kiwi o loo i Niu Kaletonia, o lea foi ua sau le tala mai le Ea Niu Sila ua faalēaogāina ana faigamalaga seia oo atu i le Aso Toonai.
E oo mai ananafi ua tusa ma le 290 tagata Niu Sila ua maua e le matagaluega o le va i fafo a Niu Sila o loo iai nei i Niu Kaletonia, ma o lea ua alu i luga faatusa i le silia ma le 250 na muai lipotia mai.
Mai le sui o le kamupani vaalele o lea o loo taofia le tumau uma faigamalaga a vaalele e pei ona sa faatulagaina a o tapunia ai pea le malaevaalele i Noumea, o le mafuaaga lea o loo iloilo ai pea ma faatalitali, ma e faato’ā toe amata faigamalaga i le va o Niu Sila ma Noumea a le Ea Niu Sila pe a mautinoa ua saogalemu e lē gata i tagata feoai ae o le aufaigaluega.
O le Aso Toonai lea ua tuu atu iai i le taimi nei, peitai e ono suia.
I nisi o taumafaiga a le matagaluega o le va i fafo a Niu Sila o lea foi ua galulue ma Ausetalia faapea nisi o paaga e fesoasoani i le aveesea mai o tagata Niu Sila o loo iai nei i Niu Kaletonia.
O le faigata o faigamalaga laveai o loo tapena nei, o loo sau uma mai Farani le ioega ma afai foi ae faataga faigamalaga o loo faatulaga e le malo, e na o le 50 le aofai o le pasese e mafai ona aumai i le taimi e tasi ma o lona uiga e foi faafia le vaa faato’ā mafai ona uma mai.
Puna o Faamatalaga: https://www.nzherald.co.nz/nz/new-caledonia-riots-air-new-zealands-next-scheduled-flight-not-until-saturday-290-kiwis-believed-to-be-stranded/ZFYDCILBVJHARMMF5GO3R2XGOQ
