Ua 24 aso talu ona uma le faigapalota tele a Niu Sila, ae o lea lava o loo faatali se tala o le isi faigamalo ma e oo mai i le taeao ananafi  e lei maua lava se tala mautinoa.

Saunoaga a le taitai o le National Christopher Luxon o loo lelei talanoaga ma pati uma e lua a le ACT faapea le NZ First, peitai i nisi lipoti e lei iai se maliega ua amata tusia i le va o pati uma nei e tolu, seia vagana ai le va lava ia o le National ma le ACT lea ua amata vavala mai maliega e galulue faatasi ai.

I le va o taitai o le ACT David Seymour ma le NZ First Winston Peters, e oo mai i le afiafi o le Aso Gafua e lei tali lava Peters i feau tusitusia poo telefoni a Seymour, ma e leai foi se tala i le feiloaiga na talo mo le Aso Gafua seia vagana ai le fonotaga a le faafaletui a le NZ First lea na feiloai i Ueligitone i lena aso.

Ae mai le taitai o le ACT, o loo iai lona faamoemoega ia mafai ona saofafai faatasi uma taitai o pati nei e tolu i le vaiaso lenei auā se maliega fai faatasi.