E lei talia e le toatele o le council a Palmerston North le talosaga ia feoa’i fua tagata mo le masina atoa e faaaogāina ai pasi.

E $60,000 le fesoasoani tupe o loo manao mai ai le Horizons Regional Council se’i fesoasoani i le poloketi o le a feoa’i ai na o pasi fou alu i le eletise mo le masina o Fepuari o le tausaga fou ma o se talosaga o loo lagolago malosi iai councillors toalua ia Brent Barrett ma Kaydee Zabelin.

O le manatu o i laua nei o le a fesoasoani lea a o iai tagata i le taugata o le soifuaga ma o le faaaogā ai foi o pasi o le tele le faamāmā avega mo le toatele.

Peitai o le toatele o councillors e lē o lagolagoina le sainia o se siaki tupe mo le talosaga ma le tala o lea o le a aloaia le feoai fua o fanau lalo o le 13 tausaga ae ‘afa le tau o pasese o talavou faapau mai le 25 tausaga.

O le leai a nisi e mafua ona e lē fetaui le faatupe e le 95,000 tagata Palmerston North o lenei talosaga ae na o le 400  e penefiti ai.