Ua lē taunuu le malaga sa fuafua mai i Ausetalia a le alii Peresetene o le malo tele o Amerika, Joe Biden.
Sa fuafua e auai faatasi ane le alii Peresetene faapea le Palemia o Initia o Narendra Modi ma le Palemia o Iapani, Fumio Kishida o ni malo faaaloalogia a le Palemia o Ausetalia i le Quad Leaders Summit sa fuafua mo le aso 24 o le masina nei Sini, peitai la o lea ua le taunuu ona o le lē auai o Biden.
Fai mai lipoti o loo fuafua pea le Peresetene e agai ese ma Iapani i le vaiaso nei mo le Group of Seven Summit ma toe foi ai i Amerika i le Aso Sa.
Na ta’ua e le 9News na talanoa Biden ma Albanese i le taeao analeila ma faailoa ai le tulaga lea o le a toe tolopo ai lana malaga mai i Ausetalia mo le taimi nei ona o nisi o tuatuagia tau le malo.
Fai mai Albanese o loo faamoemoe foi na te asia Uosigitone i se taimi o i luma o le tausaga nei lava.
