O le faamaonia o le moliaga o le faatamala o le alii leoleo sa kapeteniina le vaaleoleo o le Nafanua, ma faasala ai ile suia o lona tulaga faaleoleo poo le rank ise tulaga maualalo mai le tulaga o le leoleo superenitene sa ia umia, ua lava lea e faamaonia ai le mafuaaga o le faaletonu na mafua ai ona pa’ulia le vaa lea na oso i luga o se amu tele ma faaleagaina ai le vaega i lalo.

Ua faaalia e le Minisita o leoleo falepuipui ma le ola toe fuataina le afioga Faualo Harry Jeffrey Schuster ise lipoti a le nusipepa o le Samoa Observer, o le taunuuga o lea faamasinoga ma le suesuega na faia e le Matagaluega o Galuega tetele e iai ma le vaaia o le pulega o uafu, ua lava lea e faamauina ai le mafuaaga o le mea na tupu, ma ua le faaauauina ai le faaiuga sa faia e le kapeneta e faia se komisi su’esu’e.

Ua faailoa e le Minisita i lea lipoti ua faamavae foi le sa avea ma kapeteni ile tuanai o lea faaletonu na tulai mai ma le taunuuga ua iai lona faamasinoga faaleoleo poo le police tribunal.