Ua lē manuia le finauga a le afioga Tuala Iosefo Ponifasio sa talosaga ai i le faamasinoga e totogi muamua e le alii faipinisi Niu Sila o Alan Belcher le sefululima afe tala, o se security cost, a o lei suesueina le tagi o se su a lea faipisinisi o loo faasaga i le afioga Tuala o se sui faipule o le Palemene o loo tauaveina le tofi Sui Palemia.

O le teena o lea talosaga o le a faaauau ai ona tagofia le su a le faipisinisi i se aso o le a faatulaga mai e le faamasinoga maualuga.

O le mataupu lenei o loo finau ai le faipisinisi o lana masini uapato le excavator na faatau e lē ua ia molia e aunoa ma sana ioega. 

I le faamasinoga sili lava, o le faamaonia o moliaga e 3 o le alii o Malili Siafolau 42 tausaga le matua, o lona faia o se fesootaiga solitulafono ma se tina 26 tausaga, o lona faamata’u e faaoolima iai, ma lona umia o se aupega matautia, ua tolopo ai le lauina o sona faasalaga i le Aso Faraile asau se’i tālia se lipoti mai le ofisa faanofo vaavaaia.

O Malili na alu i le fale o le tina na aafia i le po i le masina o Iulai o le tausaga na tea nei, ae na o le tina ma lana tama 2 tausaga le fale, ona sa agai lona toalua ma nisi o le aiga i Fasitoo-tai i le tapenaina o se maliu.

O le faamuli ai o le tina ma lana tama na maua ai ma le avanoa o lē ua molia e ulufale faamalosi i le fale ma ia faatino ai solitulafono ua molia ai ae sa ia teena uma moliaga.

O le mae’a ona suesue o molimau a leoleo na faamaonia ai ona moliaga.