Ua lē talia e le faamasinoga maualuga le talosaga a le vaega faaupufai e puipuia aiātatau a tagata le H.R.P.P, e fia avea ma se tasi o Itu Auai i le faamasinoga o loo loma o le a suesue ai le faamavaega a sui faipule e toatolu sa lagolagoina lea pati faaupufai ae ua faamavae.

O le Aso Tofi na aumai ai lea faaiuga i le talosaga, ae peitai ua finagalo le faamasinoga e na o le pau le itu e mafai ai ona iai se leo o lea pati i le taimi e suesue ai le mataupu, o le avea o se itu e Faauilavea poo le intervener, pe a oo ina tagofia tuuaiga a nisi o faipule e toatolu lea o loo latou faaalia ai ia latou molimau tusitusia poo affidavits, e iai le mafuaaga na suia ai e le H.R.P.P a o avea ma faigamalo le teuteu o le tulafono o faigapalota ma le faavae, ae tuu iai aiaiga o le soloia o se tofi faipule o se nofoa o se itumalo faapalota i le Palemene, pe afai ae faamavae se sui usufono ma se pati faaupufai sa ia lagolagoina, i le faamoemoe e fia ave lana lagolago i se isi vaega faaupufai.

Ua aumai ai ma se poloaiga a le faamasinoga i lana faaiuga, e na o tuuaiga lava e afea ai lea pati faaupufai i le taimi o suesuega a le faamasinoga, e avanoa ai so latou leo, e oo foi i se tapenaga mo se folasaga i se finauga mulimuli poo se submission e tapulaa le avanoa. 

E pei ona silafia o le faamavae o sui faipule e toatolu mai le vaega faaupufai e puipuia aiātatau a tagata na lesitala ma tauva ai i le palota tele o le tausaga 2021, na finauina ai e le taitai o lea pati faaupufai le Fofoga Fetalai, ina ia usitaia aiaiga o le faavae ma le tulafono o faiga palota i le soloia o nofoa o le itumalo o Faleata 4, le itumalo o Siumu, ma le Vaa o Fonoti ona ua latou soli aiaiga o le tulafono faavae ma le tulafono o faigapalota.

O le mafuaaga lea o le tuuina atu e le Fofoga Fetalai o le mataupu lenei i le faamasinoga mo se iloiloga faaletulafono ma aumai ai se faaiuga mulimuli.

O loo finau ia sui faipule le tofa Ale Vena Ale, Tuu’u Anasii Leota ma Mau’u Siaosi Pu’epu’emai, ua afaina o latou aiātatau faaletagata soifua e filifili ai e faamavae mai le vaega faaupufai ae see atu e avea ma sui faipule tutoatasi, ae le o le lagolago i se isi vaega faaupufai.

O tausaga ua tuanai a o lei faia teuteuga fou ua ave nei i le faamasinoga mo se iloiloga faaletulafono, sa iai aiaiga a faamavae se faipule mai se pati faaupufai, poo le tuliesea mai se vaega faaupufai sa avanoa ona see e avea ma faipule tutoatasi.

Peitai na soloia lea aiaiga ina pasia teuteuga fou a o lei faata’ape le paeaiga lona 16 a le Palemene, lea na sosoo ma le palota tele i le masina o Aperila o le tausaga e 2021.

O le aso 6 o le masina fou o Iuni e valaau ai le mataupu mo le faatulaga ai o tapenaga a itu auai a o lei tagofia lenei mataupu i ona tulaga aoao tetele.