Ua toe aliae foi isi lipoti o le lē lelei o fale o loo nonofo ai tagata galulue faavaitaimi.
O le asiasiga a le Local Focus na lipotia ai e 28 tagata faigaluega faavaitaimi o loo nonofo i le fale e 4 potumoe i Hawke’s Bay, ma e tusa ma le $3,500 le rent i le vaiaso o loo totogi.
O Hawke’s Bay o se tasi lea o vaega o Niu Sila o loo faatali le taunuu mai o le isi tusa ma le 5,000 tagata Pasefika e galulue faavaitaimi i masina a sau.
E lei mamao atu foi na sau ai le lipoti a le komisi o loo vaaia aiātatau a tagata Niu Sila, o loo toe faailoa ai le lē lelei o fale o loo nonofo ai tagata galulue nei, ma ua soli ai aiātatau a tagata soifua.
I le asiasiga a le Local Focus na asia ai foi le fale fogafale lua o loo nonofo ai le 50 tagata faigaluega mai Solomona, ma e faapea o loo nonofo i le pito i luga, a o lalo o loo faamautu ai tagata Vanuatu.
Ae e ui i le faaomiomia ma le leai o se saolotoga, ae i lipoti o loo toatele o loo fiafia ma o le toatele foi e sili atu le nonofo i fale ua tapena e fale faigaluega o loo omai e galulue ai na i lo le tau savali mai i tua ona e faigata mo feoaiga.
Mai le peresetene o le Hawke’s Bay Fruitgrowers’ Association, Brydon Nisbet o le tele o fale o loo nonofo ai tagata galulue faavaitaimi o loo i lalo o vaavaaiga a le malo.
O lea na faamaonia mai e le malo o se tasi lea o itu o loo taulai iai le toe iloiloina o galuega faavaitaimi.
