Ua faaleo o nisi e aumau lalata ane i le nofoaga ua fausia ai le malaevaalele fou i Sini, le lē fiafia i le faigamalo a Niu Sa Uelese mo le ofoina atu o se tau maualalo mo o latou fale ma fanua o loo mana’omia mo le fausiaina o le galuega.

O ofo na tuu ane e le Malo mo nisi o ia aiga e pei ona faailoa i lipoti a le ABC ua faailoa ai e $468 afe na tuuina i se tasi aiga mo le fitu ma le ‘afa eka o lo latou fanua ma fai mai aiga ua lē fetaui tele lea tulaga.

O nisi o nei aiga o nai tagata matutua ma ua faailoa o latou finagalo i le lipoti ua autausagā o aumau i lea vaega o Sini peitai ua matua’i aafia i le fuafuaga e pei ona iai mo lea malaevaalele fou.

O isi aiga na faatali i’uga mai le faamasinoga e tusa o fanua ma meatotino ma e itiiti tupe ua ofo ane e le malo nai lo tupe sa faatalitalia.

O nisi loia o loo tula’i mo nai isi aiga o loo aofia i le mataupu lea ua o latou ta’ua afai ae lē manuia pea le finau i le tulafono ua alagatatau loa ona silasila Faipule poo le Palemene foi i le suia o le tulafono auā se puipuiga mo tagata e ana fanua e aafia i ituaiga fuafuaga faapea.

Puna o Faamatalaga: https://www.abc.net.au/news/2024-12-09/stateline-nsw-western-sydney-airport-acquisition-delay/104696168