Ua faamatuu mai nei e le Greenpeace Australia Pacific sa latou pepa o faamatalaga ua faitioina ai le maliega a le malo ma Amerika ma le United Kingdom, le AUKUS Deal e pei ona fofogaina foi se isi ona vaega tāua i le vaiaso nei i Amerika.
O le faauluuluga o le Greenpeace i Ausetalia David Ritter ua ia faailoa o le maliega lenei o le a iu ane i se tulaga na te faaigoaina o se talaaga pogisa, dark legacy ma o le a maua ai ma otaota o meatau niukilia i Ausetalia mo le fia o tupulaga i le lumanai.
Ua ia faailoa foi sa sili ai ona faaaoga tatau tupe i le foia ai o nisi mataupu ogaoga e pei o suiga i le tau, auaunaga o le soifua maloloina lautele ma le soifua manuia o tagata.
O lana faatalanoaga i luga o le Radio 2GB ua ta’ua ai e le Palemia o Anthony Albanese o le maliega lea i lalo o le AUKUS o se laasaga lea i le itu sa’o.O le maliega foi e le na o se faiga faavae tau le puipuiga, ae faatatau i le tomai o Ausetalia i le tulaga tau le puipuiga ma lona agavaa i le fausiaina o mea.
