E toatolu tamaiti na lavevea uma i se taavale i le afiafi ananafi i le faaitu o Crows Nest i Sini ma ua molia ai nei le avetaavale o lea taavale.
Fai mai leoleo o loo feta’ua’ina o le avetaavale lea e 18 tausaga na sau i le moli mūmū ma lavevea ai tamaiti sa kolosi ane ina ua ola le moli meamata o le alatele.
O le Pacific Highway na tupu ai le faalavelave i se vaega pisi o le alatele poo le ‘afa o le tolu i le aoauli ananafi.
O le isi tamaititi 13 tausaga na ave atu i le falemai o tamaiti i Sini ae o le isi toalua e ta’i 12 tausaga na ave atu i le falemai o tamaiti i Westmead.
O le taavale na aofia i le faalavelave o le Honda Accord ua ave e leoleo ma ua faaleaogaina le laisene ma e lei talia le talosaga e tatala ai i tua.
O le a toe tulai i luma o le faamasinoga i Manly i le asō.
