O se tala fiafia le faasaoina ai o se alii ina ua lavea’ina mai lona ola a o iai i le sami.
I lea matāupu, e faamauina sa tali atu le ofisa o tiute, New Zealand Customs vessel Hawk V ina ua oo atu se valaau mo se fesoasoani i Marsden Cove, i le moomia ai ona lavea’ia se alii o loo faaopeopea i le sami.
Faamauina ua atoa le 30 minute o i le vai ma e māua e le’i iai sona ofu faaola sa ia ofuina ma o loo ia pipiimau atu i se foe.
Ta’ua i faamatalaga mai le ofisa o tiute e ala i se latou faasalalauga i luga o upega tafa’ilagi, le aafia ai o le ao poo le ulu o lea alii, ma ua tauāu ina aafia i le mālūlū tele o le sami.
Sa mafai ona tali atu le vaega o tiute i tulaga masani o fesoasoani muamua, a o le’i avatu o ia e le vaega a le Coastguard mo le taavale a le falema’i e avatu ai i le falema’i mo togafitiga.
Ta’ua ua i le fale nei ma lona aiga lea alii ma ua faasolosolo manuia.
Faamauina o le lona 5 ai lea o galuega tau sa’ili ma galuega lavea’i a le vaa faaola a le Hawk V ua faatautaia i lenei tausaga.
Ua fautuaina le to’atele o faifaiva ina ia manatua le fai o latou ofu faaola poo life jackets i taimi uma e aga’i ai i le sami.
Puna o Faamatalaga: https://www.facebook.com/share/p/1DcsmgM5Bt/
