E 80 tausaga le matua o se tua’āsinasina na lavea’iina mai lona ola, ina ua leiloa mai o ia ma aafia ma leiloa ai se mea, a o iai i sana savaliga i Kauaeranga Valley, Coromandel.
Faamauina i lipoti, na maua e se tinā ma lana fanau tama e to’alua lea tamā matua, ma e faapea sa ia ofuina se ofuvae pupuu (shorts) o se mitiafu lima pupuu (singlet) ma e le’i iai se faguvai poo se meaai foi, ae ua na o se telefoni.
I tala’aga i lea matāupu e faapea na faailoa ane i le ofisa o leoleo lea matāupu poo le itula e 10 i le po o le Aso Sa, ina ua valaau ane se alii mo se fesoasoani.
Ma o lea na vave faatino loa e leoleo a latou iloiloga ma sa’ili’iliga e tusa ai ma auala faatekonolosi, poo le track ai o le telefoni.
Māua na o latou maua i iloiloga e 100 mita le mamao o loo iai mai le Crosbies Hut.
E lua ni vaalele lavea’i, o helikopa na aga’i e fesoasoani atu peita’i e le’i mafai ona tulaueleele ona o le leaga o le tau.
Ma o lea na faamauina ai loa le faafesoota’i ane o se tinā ma lana fanau tama o loo nonofo lata ane mo le fesoasoani; ma o lea na o latou mauaina atu le tamā o loo matapogia e lē o iloa se isi.
O lea na taumafai ai loa le tinā ma si ana fanau e to’alua e faatino vave gaioiga ina ia taumafai e fesoasoani e ala i le faamafanafanaina o le tamā ma taumafai loa e ave le tamā i lona fale o loo aumau ai.
Māua i lipoti, na taunuu ane sui o fesoasoani muamua i le tamā e 80 tausaga le matua i le taeao o le Aso Gafua ma faatino a latou galuega iloilo.
Faaalia e le ta’ita’i leoleo asiasi, Inspector Mike Henwood, o se tulaga maoa’e ona ua matuā laki lava le maua o le tamā, ma ua fautuaina ai le to’atele o loo fuafua e aga’i mo ia savaliga umi, ina ia manatua le ave o mea e tatau ona ave, e pei o ofu e tatau ona ave; meaai ma faguvai ia aua ne’i galo, tusa foi pe na o sina taimi e alu ai se savaliga.
Puna o Faamatalaga: https://www.rnz.co.nz/news/national/582844/close-call-elderly-man-saved-after-collapsing-getting-lost-during-hike-in-coromandel
