Lavea se tina matua i se pasi i le taulaga i Sini i le vaiaso nei. Fai mai leoleo na valaau ane le latou fesoasoani i se faalavelave i le fetaulaiga ala i Elizabeth ma Goulburn Street poo le tea o le fa i le afiafi o le Aso Lulu ona o lipoti o se tagata na savali ane i le auala ua aafia i se pasi.
Taunuu atu paramedics ma togafitia le tina matua 74 tausaga i le nofoaga lea ma aveina atu i le falemai i St Vincent peitai na maliu ai lava i le afiafi o le aso lea.
Faatino suesuega a leoleo ma ua faailoa mai foi o le avepasi e 74 tausaga foi le matua ma sa aveina foi i le falemai i Sini mo siaki, mulimuli ane toe ave i le ofisa o leoleo mo suesuega ma ua molia ai nei i le avetaavale matautia ua mafua ai le maliu, avetaavale faatamala ma le tuu avanoa i le tagata savali.
Sa mafai ona tatala i tua ma o le a tulai i le faamasinoga i Downing Center i le aso 11 o Ianuari o le tausaga fou.
Ua faaleaogaina foi lē tumau ma lona laisene i le taimi nei.
