O le teineititi ua lipotia na lavea i le taavale i le aoauli ananafi i le taulaga o Kaitaia i le Far North ua faailoa i lipoti i le asō ua uma lona ola i le falemai.
O faamatalaga mai le leoleo suesue sinia o Kevan Verry ua faailoa ai o le teineititi e 20 masina le matua ma ua ta’ua i le lipoti na lavea a o agai ese mai se taavale mai se driveway ma ave ai e ona mātua i le falemai i Kaitaia ma sa faailoa e le aufaigaluega i le falemai lea e tigaina manu’aga o le teineititi.
Na ave ane i le vaalele i le falemai o tamaiti i Aukilani peitai o le taeao analeila na faailoa mai ai se lipoti ua uma lona ola.
Fai mai o loo faagasolo nei le suesuega a leoleo ma faatalanoa nisi o le aiga e tusa o le faalavelave ua tulai mai.
