O le faailoa ai e le ta’ita’i o le Malo o le mana’o o le Tupu o Salesa III e fia feiloa’i atu i le afioaga ma le itumalo o Siumu o le a faamautū ai ma lana aumalaga pe a malaga mai i le Fono a Malo o le Taupulega, ua faailoa ai e le tofi Pulenuu o Siumu i Sisifo i le nusipepa o le Sunday Samoan, tapenaga ua faatino o le faafotu tupu e faae’e ai se suafa matai tāua maualuga i le Tupu o Salesa.
Ua faailoa e le pulenuu le afioga Tofaeono Kitiona i le nusipepa, sa talanoaina i se fono a le nuu se suafa matai e faasuafa ai Salesa lea e lua suafa o loo filifili iai, o le To’aiga o Tumua ma le Asomua le Malama.
Ua faailoa lautele e le ofisa o le malo Peletania i Samoa nisi o polokalame o le malaga mai i Samoa o lana maiesetete ma lana masiofo ae e lē o aofia ai se sauniga e faae’e ai se suafa matai o le Tupu, peitai o le itu mautinoa o se tasi lea o fuafuaga o le a faaopoopo i le polokalame.
O le ‘ava faatupu e faafeiloa’i ai le faigamalaga mamalu o le a faia i le Iunivesite aoao a Samoa, o le tasi lea o polokalame ua faamautū faatasi ai ma isi tapenaga ua mae’a ona faailoa lautele mai e le komiti o tapenaga a le malo.
O le faletalimalo o le Sinalei o le a afio ai le Tupu o Salesa ma lana masiofo o Camilla.
