I le savalia ai nei o le lua vaiaso talu ona faagasolo le suesueina o molimau i le faamasinoga o Lema’i Faioso Sione ma Malele Atofu Paulo, o loo molia i le taupulepule e tagatavale lē sa avea ma Palemia le susuga Tuilaepa L Sailele Malielegaoi, o le Aso Gafua o le vaiaso nei i le faaauauina o lea mataupu i le faamasinoga sili a le atunuu, na amata ai ona valaau molimau a i laua o loo tuua’ia, faapea ma molimau tuufofoga a Lema’i ma Malele.
Ua faaalia e se loia o loo tulai mo se tasi o i laua o loo molia, e ono mae’a suesueina mau a i laua o loo molia i le Aso Lua o le vaiaso nei.
Ua mae’a suesueina molimau a leoleo ma o loo tālia le faamae’a o molimau a le itu o loo faasaga iai moliaga a leoleo, ona iloa ai lea o se aso e faia ai folasaga ma finauga faaiu a loia o itu auai o lenei faamasinoga.
O loo iai le poloaiga a le faamasinoga ua tapu ai ona faasalalau mau o loo suesueina i luma o se laulau o faatonu, ona e iai se isi tagata o loo masalomia ma tuuaia i le moliaga lava o le taupulepule e faaoo le maliu.
E le o mautinoa i le taimi nei poo afea e aumai ai mai Ausetalia i Samoa lea tagata o loo tuuaia mo lona faamasinoga.
O le liolio o le faamasinoga i aiātatau a lea tagata ina ne’i satia ma afaina i lona maua o se faamasinoga sagatonu ma faamaoni, o le mafuaaga lea o le lē mafai ona lipotia i le taimi nei o mau o lenei mataupu.
O se faamasinoga ua lausilafia e le atunuu lona amataga mai ina ua faatoa oo moliaga i luma o le faamasinoga.
