Ua lape se vaega o le faai’uga a le Faamasinoga Maualuga na fofogaina i le masina o Me o le tausaga nei, lea na aumai ai le faaiuga ua tolu nofoa faaopoopo o tamaitai i le Palemene, ma oo ai i le fitu nofoa faaopoopo ae le ono, e pei ona iai le faaiuga a le faamasinoga o talosaga apili a le faamasinoga maualuga i le tausaga na tea nei, a o iai i se tulaga le mautonu upufai o le Malo i le maea o le palota tele o Aperila o le tausaga ua mavae.
O le afioga Toomata Norah Leota na filifilia mai i le faaiuga a le faamasinoga maualuga ia Me ma faaaoga ai le vaega (1E) o le aiaiga autu 44 (1A) o le Tulafono o Faigapalota faasino i le 10 pasene o nofoa o tamaitai i le Palemene.
O le vaega 1(E) o loo faasino i le filifilia o se sui tauva tama tane mai se palota laititi, ina ua faamavae poo se isi lava mafuaaga, se tamaitai sa ia umia le tofi faipule.
O le faaiuga a le faamasinoga o talosaga apili ua taunuu ai i le finagalo autasi, e le o le agaga ma le uiga o le aiaiga 44(1E) a faamavae se sui faipule tamaitai ona tatau lea ona suia i se isi sui usufono tamaitai.
E iai le talitonuga o le vaega lea o le faaiuga a le faamasinoga sili le supreme court, na mafua mai i le filifiliga a le itumalo palota o Falealupo lea na manumalo mai ai i le palota tele o le 2021 se sui tauva tamaitai.
Peitai na toe faamavae le sui na manumalo i le nofoa a o lei faatautoaina faipule o le paeaiga lona 17 a le Palemene, ona o tagi o faatosina solitulafono o le palota tele.
Na toe faia le palota laititi a lea itumalo ma filifilia mai ai e aunoa ma se palota laititi na faia se tamalii ua seei nei i le tofi o lea itumalo le tofa Fuiono Tenina Crichton.
O sui faipule tamaitai e toalua mo nofoa faaopoopo ua atoa ai le toaono o tamaitai i le Palemene na filifilia mai i le aiaiga o le 10 pasene ina ua maea le palota tele le afioga Aliimalemanu Alofa Tuua’u, ma Faagasealii Sapoa Feagia’i na filifilia mai i aiaiga lava o le 10 i le mae’a o palota laiti na faia ia Novema o le tausaga na tea nei, ina ua mae’a faamasinoga o tagi o le palota tele.
Mo le silafia na faato’a faatauto ia sui faipule faaopoopo o nofoa o tamaitai i le tuanai o le ono masina o tālia se lu’i faaletulafono na ave i le faamasinoga na fesiligia ai le auala poo le formula na faaaoga e le Komesina o faigapalota i le sailia o nofoa faaopoopo e lua e maua ai le ono o nofoa o tamaitai.
O le lu’i lea na aumai ai le faaiuga a le faamasinoga maualuga ua faamaonia sui faaopoopo ia e toalua ma le sui faaopoopo lona tolu lea ua soloia e le faamasinoga o talosaga.
O le soloia o le filifilia o le afioga Toomata Norah Leota ua faamuta ai ma lona tofi faipule na filifilia iai e ala i le faaiuga a le faamasinoga maualuga i le masina o Me, ua tusa ai nei ma le ono masina.
Ae i le faaiuga a le faamasinoga apili na faalauiloa i le amataga o lenei vaiaso le Aso Gafua, ua faapea mai ai, e talu ai o nofoa faaopoopo e lua ua filifilia iai le afioga Faagasealii Sapoa Feagia’i ma Aliimalemanu Alofa Tuu’au ua atoa ai le ono o nofoa o tamaitai e fua i le 51 o nofoa o le Palemene, o le numera foi lea e tatau ona taoto ai e tusa o aiaiga o le 10 pasene i lalo o le vaega 44(1A) o le Tulafono o Faigapalota.
O le tasi lea o fesili sa fesiligia ai ni finagalo o tagata palota o itumalo e 51 ao faagasolo le sailiiliga a le Komisi suesue o Faigapaplota, pe faatumau lea aiaiga pe soloia, poo le faia iai o ni teuteuga.
