Fuimaono Dr Dylan Asafo
Fuimaono Dylan Asafo

Lapataiga mulimuli a le faamasinoga maualuga

Ua finau le alii faiaoga o mataupu tau tulafono i Niu Sila ia Fuimaono Dylan Asafo o lea ua tuuina atu e le faamaisnoga maualuga lana lapataiga mulimuli i le Palemia Tausi le tumau ia Tuilaepa Lupesoliai Sailele Malielegaoi.

O le aso ananafi na tuu mai ai le faaiuga a le faamasinoga maualuga e faapea e soli faavae le faatautoga na faia e le FAST i lalo o le faleie i le Aso 24 o Me 2021.

O le manatu a Fuimaono “o le faitauga talafeagai o le faaiuga a le faamasinoga lea ua faaleaogaina ai le faatautoga na fai a le FAST e i lalo o le aiaiga e tasi, o lea aiaiga ina ia tauaofia le Palemene i totonu o le 7 aso e aunoa ma nisi lava gaioiga e ono fai e Tuilaepa, le Ao o le Malo, le fofoga fetalai o le malo tausi, le failautusi o le fono aoao faitulafono ma sui filifilia uma a le HRPP ae le gata i lea o le Loia Sili e taofia ai le tauaofiaga o le Palemene”.

O le gaioiga e ala i le poloaiga a le faamasinoga maualuga ua tuuina atu ai ia Tuilaepa, le Ao o le Malo, le fofoga fetalai o le malo tausi, sui filifilia a le HRPP, failautusi a le fono aoao faitulafono ma le ofisa o le loia sili le avanoa e tasi o se lapataiga mulimuli e fai ai le faaiuga ale faamasinoga maualuga, a leai o le a molia uma i latou i lalo o le contempt of court ma o le a toe faaaoga ai le faatautoga a le FAST na fai i le Aso 24 o Me e aloaia faaletulafono ma e tusa ma le faavae.

Peitai o le faataunuu ai o lenei lapataiga mulimuli, manatu Fuimaono e tele foi lape o mafuaaga a le faamasinoga na tuuina mai, ae ui i lea e lē talitonu Fuimaono o le aotelega o le faaiuga atoa e sese i le tulaga ua iai.

Taua foi e Fuimaono na fai e faamasino o le faamaisnoga maualuga lenei faaiuga ma le mafaufau lelei i le tulaga ua iai vaega o faigaupufai o le malo a Samoa i le taimi nei. Manatu Fuimaono ana faapea e tuumai le iuga a le faamasinoga e faatulafonoina le faatautoga na fai semanū e matuai tele ni feeseeseaiga e tulai mai aemaise lava ona o lea na tuumai le faaiuga a le faamaisnoga apili i le amataga o le masina ae le gata i lea o le tele o tagi o le faigapalota poo petitions o loo faagasolo nei .

Ina ia mafai ona iloilo ma faatalanoaina faalauaitele mataupu eseese o i totonu o le faaiuga a le faamasinoga e taiala ai foi faamasino ma loia ma le au fai tulafono i se tulaga e ono toe tula mai i le lumanai. Na faavasega ai e Fuimaono nisi nei o lape o le faaiuga a le faamasinoga i lana vaai faaletulafono.

  1. solifaavae le faatautoga

Na fa’aaoga e le faamasinoga se auala lē fetaui ma le lē atoatoa e faamatala ai le solifaavae o le faatautoga na fai, e ui ina amanaia e le faamasinoga o lea sa iai auala manino i le taumafai e taofia le faatinoina o auala sa’o o le tulafono faavae na lape ai le faamasinoga e iloilo atili le lē usitaia ai e le Ao o le Malo ma nisi e faatino a latou tiute tauave (e pei o le faaiuga a le faamasinoga i le Aso 23 o Me 2021) ma taua ai o nei gaioiga uma e solifaavae. Peitai o le lē tausisia o le poloaiga a le Ao o le Malo i le Aso 20 o Me 2021.

  1. I le faatautoga – e lē faamalieina tulaga masani ma le faaleaganuu

Manatu Fuimaono masalo na iloa e faamasino le ala na latou faauiga ai le faavae e lē atoatoa, o le mafuaaga lea na faapea ai le faamaisnoga e le’i ausia vaega faaleaganuu o le faatautoga sa fai. O le faamalamalamaga a le faamasinoga e tusa ai ma folasaga taiala a le vaega 71 o le faavae e ala i tulaga masani ma le faaleaganuu mo se faatautoga 1. e tatau ona auai le Ao o le Malo ma nisi o sui maualuluga a le malo. 2. Tatau ona faatino i totonu o le maota fono, o se vaega o le aganuu a Samoa e faailoa ai le mamalu ma o se fale e manatua ai tamalii a le atunuu ua fai i lagi le folauga.

Toe manatu Asafo o le auiliiliga a le faamasinoga e lei paleni ma atoatoa. Aua ua na’o le tagatagai o le faamasinoga i le lē ausia o gaiogia a le FAST i tulaga masani ma le faaleaganuu ae ua lē vaavaai i gaioiga a le Ao o le Malo ma isi na o latou filifili saoloto e teena vaega faaleaganuu ia ma vaavaai foi i le solitulafono o nei gaioiga o nisi o tu ma aga masani a Samoa.

E foliga mai foi e le’i tuu atu e le faamasinoga se avanoa mo le FAST e finau ai i le vaega lea o le mataupu faatatau i vaega faaleaganuu. O le isi lea pinefaamau o le mautinoa o le lē atoatoa o le faaiuga a le faamasingoa ma mulimuli ane lē fa’aaoga le doctrine of necessity” a le FAST. Ua manino ai foi le telē o le avanoa ua misi e saga faalauaitele ai le mataupu i vaega faaleaganuu mo loia ma faamasino e mulimulitai ai i le lumanai.

  1. I le faatautoga e lē faamalieina aiaiga o le Doctrine of Neccessity.

Na faalia e Fuimaono i le tulimatai pea o le faamasinoga i le latou faauigaina o le faavae ua maea ona faailoa atu, na iai le talitonuga i le faamasinoga e teena ai le finauga a le FAST i le doctrine of necessity lea na faamatalaina i palakalafa e 4. O le faaiuga a le faamasinoga o le tulaga na iai Samoa i le aso 24 o Me 2021 e le’i ausia ai aiaiga o le Doctrine of necessity e pei ona taua e le faamasinoga toe iloilo i Grenada i 1986.
Faamanino mai e le faamasinoga o le aiaiga o le leai lava o se isi auala o totoe e lei faamalieina. Mafua lea tulaga ona e faapea sa tatau i le FAST ona toe saili seisi faaiuga a le faamaisnoga ina ia faatonuina ai le Failatusi o le fono aoao faitulafono ma nisi tagata faitulafono e faatino le malelega a le ao o le malo na tuuina mai i le Aso 20 o Me.

O le vaega o loo mautinoa le misi mai i le faaiuga o le faia ma le mautinoa o le lē usitaia e Tuilaepa, Ao o le Malo ma nisi o le faaiuga a le faamasinoga lea na tuuina mai i le Aso Sa 23 o Me 2021. O le mafuaaga tonu lea na finau ai le FAST faaaogaina ai le Doctrine of Necessity. I le Aso Gafua 24 o Me na matuai manino ai le lē amanaia e Tuilaepa ma nisi o le faavae ma le faaiuga a le faamasinoga. Talu mai lea aso ua faatuputele ai le lē faaaloalo ma le faifai i iuga o le famaasinoga.

Taua foi e Fuimaono e ui lea na ia taua nisi o lape o le iuga a le faamasinoga ae na te malamalama ma lagonaina le faigata o loo feagai ai nei ma le faamasinoga i Samoa talu mai le faigapalota i le Aso 9 Aperila 2021. O lona talitonuga e ui ina lē atoatoa le fa’aiuga a le faamasingoa na tuuina mai ae o se avanoa lea e tasi mo Tuilaepa, le Ao o le malo ma nisi e faatino ai faatamalii auala o le tulafono ma toe faafoi ai Samoa i le tulaga filemu o ana faigamalo faatemokarasi.

O Fuimaono o se alii faiaoga o mataupu tau tulafono i le Iunivesite a Aukilani Niu Sila, e umia foi faailoga o le Masters of Laws mai le Iunivesite o Harvard i Amerika, Masters of Laws (First Class Honors) Iunivesite o Aukilani.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required