Ua fautuaina tagata i Sini ia agai ese ma le sami i le asō ina ua matauina le faatupulaia o tulaga lē mamā o le suavai.
O se tala lē lelei mo le toatele i le aai o Sini aemaise o le sami le sulufaga o tagata i aso vevela.
Na ta’ua e le 9News o se vaega o otaota ua tafea agai i le uafu i Sini, ma matafaga ma ua fautuaina ai e le faigamalo a NSW ina ia taofi taelega i le asō seia oo i le faaiuga o le vaiaso.
O le tetele foi o timuga i le vaiaso nei ua tafe atu ai le otaota i le sami ma vaitafe ma sao ai ma le siama i vaega e masani ai le toatele i taelega.
Fai mai a itiiti mai pe 72 itula e tatau ona faatali ai faatoa toe kilia le suavai.
