A o alo atu le tele o ekalesia Samoa i Ausetalia nei i le faamanatuina o le aso paepae o le fanau i le Aso Sa nei, atonu o le a tele ni fuafuaga e aafia i uiga loulouā o le tau ua lapataia mai ai nei foi le setete o Niu Sa Uelese i le mamafa o timuga i le aga atu i le faaiuga o le vaiaso.
Sa matele ina timu aso o lenei vaiaso mai le amataga ae o loo fautuaina foi komiuniti i timuga mamafa e oo atu i le Aso Sa.
O Vitoria ma Niu Sa Uelese lea o loo lapataia i uiga loulouā o le tau ma sa vaaia foi le lolovaia o nisi faaitu o Niu Sa Uelese i le vaiaso nei lava faapea foi nai vaega o Vitoria.
O loo faagasolo foi le tuugataavale Bathurst 1000 ma ua fautuaina foi i latou o loo auai i lea faamoemoe ina ia faaeteete ma silasila i le saogalemu.
O le Aso Sa Paepae o le fanau poo le Lotu Tamaiti ua masani ai si o tatou atunuu e le gata i Samoa ae faapea foi i atunuu e pei o Niu Sila ma Ausetalia ua aumau ai nai o tatou tagata ma o latou aiga.
O se aso e faatāua ai foi le sao o le fanau ma maua ai lo latou avanoa e molimau mai ai i matua ma aiga i upu mai le afioga a le Atua aemaise o pesepesega ma siva faaleagaga.
