Tusia : Maina Vai 

Na lapataia e le Tamaita’i Faamasino ia Niava Mata Tuatagaloa faapea le Alii Faamasino Sili ia Satiu Simativa Perese, le tamaitai loia ia A’e’au Tima Leavai ma fautuaina ina ia agai ese mai i ana upu sa tuuina atu i le molimau a’o ia fesiligia ai.

O lapataiga ma fautuaga na tuuina mai a’o faia ai le iloiloga a le Faamasinoga i le tagi a Fuiono Tenina Chrichton o se tasi o sui tauva mo le Itumalo Faapalota o Falealupo faasaga i le sui tauva o le HRPP lea o loo la tauva ai i le faigapalota laititi ia Tuitogamanaia Dr Peniamina Jr Leavai i lalo o le agavaa i le monotaga.

O le Tamaita’i Loia ia Aeau Tima Leavai o loo tulai ai mo lona tuagane ia Tuitogamanaia, ma i le valaauina ai o mau o lea mataupu sa tulai ai se tasi o matai tausinuu mai Falealupo, ua 57 tausaga o le soifua, le afioga ia A’eau Kamilo Petelo Fuiono.

Sa molimau Aeau Kamilo e leai ni lafoga ma ni mea o faia a Tuitogamanaia i le Fuaiala faapea ai ma le nuu, pau lava le taimi na ia vaai ai iai o le taimi o le nofo a Tima i le suafa A’e’au. Ina ua tuuina le avanoa i le Tamaita’i Loia ia Aeau e fesiligia ai le molimau sa ia tuuina atu i le molimau pe o ia silafia ua maea faatautoina lana molimau ma e matua le manaomia lava sina tama’i pepelo.  

Na tali mai le molimau e leai…. ma toe faapea atu ai loa le Tamaitai loia…”E le tele lava na’o sina lima tausaga lava i le falepuipui i le tauto pepelo”

Na faasalavei mai le Tamaitai Faamasino ia Tuatagaloa ma ia fautuaina ai le Tamaitai loia ina ia aua nei ona faamata’uina le molimau.

Sa faapea foi le tulaga na iai se tasi o molimau na fesiligia, a’o taumafai mai le tali sa faapea ona toe polili atu le isi fesili a le Tamaita’i loia i le molimau, ma faasalavei mai ai le Faamasino Sili ia Satiu Simativa Perese e faapea e tatau ona tuu le avanoa i le molimau e tali mai ai.

I le taimi na fesiligia ai fo’i le tasi molimau o se tasi foi o matai ma o se tiakono i le EFKS i Vaotupua Falealupo le Susuga ia Togia Mose lea sa ia faailoa i le Faamasinoga o ia foi faatoa vaai lava ia Tuitoga i le taimi o le palota lea sa tauva ai lona tuafafine, ma e leai leai lava se matafale o faia a Tuitoga i le Ekalesia…..Sa faapea ona faasalavei atu le tamaitai loia ia Aeau Tima Leavai ma ia faapea atu…..”Aua lava nei toe fai maia le tala lena e leai se matafale o faia”

O lea taimi sa faaoga mai ai loa e le molimau ma faataitaiga le taimi na maea ai le nofo a le Tamaitai Loia i le suafa A’e’au lea sa ia talosaga ai loa i le faifeau e manao e fai sana matafale….peitai sa teena e le tamaitai loia lea tulaga ma ia taumafai ai e tali atu i le molimau e faapea…”E leai sa’u tala faapena na faia”. Sa taumafai le tamaitai loia e finau atu i le molimau ae fautuaina loa e le Faamasino Sili ma faapea mai ai

“Ia e faaetete i lou laasia ai o le laina lena”….. peitai sa avatu foi le finauga a le tamaitai loia i le Faamasino Sili e tusa ai o mea o loo taua e le molimau ae sa toe tulitatao mai e le saunoaga a le Alii Faamasino ma ia faapea ai.

“O le faiuga lava na e faia, sa e filifili ai e te tulai ma sui o lou tuagane”

O nisi o molimau e aofia ai le Faifeau EFKS mai Vaotupua i Falealupo ia Namaia Kofe Tuiletufuga lea sa ia ioeina ina ua fesiligia, o le tautua a Tuitogamanaia sa ala atu lea i le Matafale Faamauina a lona Tama ia A’eau Peniamina, o se tautua a le atalii i lona tama, a’o le suafa Tuitogamanaia foi i le feagai ai ma A’e’au o ia ose matai e tautuaina A’eau.

Sa fesiligia  e le tamaita’i loia ia A’e’au Tima pe o le a la le isi ana faaupuga a ia lava po’o sona lagona i le galuega lea a Tuitogamanaia i le matafale a lona tama pe le’o lana ia lava lea monotaga e ala atu i lana tautua lea i lona tama.

Sa faapea mai le Alii Faamasino Sili, e le talafeagai ona finau atu le Tamaitai loia e ala atu i le molimau….o lana lea finauga faaiu (submission) ae le auala atu i le molimau lana finauga.

O le Aso Gafua lea o le a tuuina mai ai le faaiuga a le Faamasinoga i lea mataupu.