Ua lapata’ia sui o le Freedom and Rights Coalition e tusa ai o se tasi o faamoemoe o loo fuafua mo le faai’uga o le vaiaso i le Auckland Domain.
Fai mai le lipoti a le Newshub e oo mai i le po anapo e lei iai se faatagana ua sailia e le kulupu lea ua sailia mai le Pulega a Aukilani e faataunuu ai le latou savali ua faaigoa o le Kiwi Patriot Day and March, lea ua fuafua mo le Aso Toonai nei.
Ua ta’ua i le lipoti o faalauiloa ma faasalalauga o le faamoemoe lea i luga o le social media o loo ta’ua ai o le a iai loli o taumafa, maketi a le aufaifaato’aga, musika leo tetele ma nisi o polokalame lea fai mai le Council poo le pulega o mea uma ia e mana’omia ona iai se pemita e fai ai e pei ona aiaia i lalo o le Public Trading Events and Filming Bylaw 2022. O loo ta’ua ai foi i ia faasalalauga o le a iai ma se isi faamalu fou o se vaega faaupufai o le a folasia ai.
I se faamatalaga mai le Council e pei ona aofia i le lipoti ua faailoa ai e faaaloalogia e le Council aiātatau a tagata e tetee ai peitai e iai le popolega ina ne’i faaleagaina le domain pe faalavelavea ai foi fuafuaga a le lautele mai ia polokalame. Fai mai leoleo o loo latou mata’ituina le mataupu ae lē o faailoa maia se faamatalaga mai le kulupu lea e tusa ai o le mataupu. O le faalapotopotoga lea o loo feta’uaina foi le aofia ai ma le ta’ita’i o le Destiny Church, Brian Tamaki.
