O loo faatalia pe iai se finagalo faaalia o Ausetalia i le lapata’iga ua tuuina nei e le Peresetene o Saina o Xi Jinping i le malo tele o Amerika ma lona Peresetene Joe Biden i le mataupu e faatatau ia Taiwan ae o loo feta’uaina foi se faamatalaga e ono malaga mai le Fofoga Fetalai o le Maota o Amerika, Nancy Pelosi i le motu o Taiwan.
O faasalalauga mai le malo o Saina ua ta’ua ai ua mae’a ona faailoa atu e Jinping ia Amerika i se talanoaga i le telefoni e ao ona usita’ia e Amerika le One China Policy ma faamanino atu ia Amerika e matua’i tetee Saina i se tuto’atasi o Taiwan ma le faalavelave mai o malosiaga poo atunuu mai fafo.
Ua faailoa foi e le ABC i lana lipoti le tuuina atu o ni lapata’iga a Saina ia Amerika, pe afai ae oo ona asiasi mai Pelosi i Taiwan. Fai mai le lipoti o le faamatalaga a Jinping na fai ia Biden, o i latou e taaalo i le afi, e oo ina mu ai. O loo ta’ua i le lipoti se faamatalaga mai se sui sinia a le malo o Amerika e faapea sa faatalanoa e Biden ma le ta’ita’i o Saina se avanoa e feiloai ai mo se fonotaga ma e manatu o le mataupu e faatatau i le tatala pea o laina o fesoota’iga ma lea foi atunuu. E lē o faailoaina se finagalo o Ausetalia i le mataupu auā o loo latou mata’ituina foi Saina ma ana gaioiga.
