Ua lapatai mai se tina 35 tausaga le matua mai Lalovaea ananafi i le atunuu i luga o upega tafailagi, ona o se faalavelave e lei mafaufauina e ono tupu ia te ia a o iai lea i le vaega tonu o iai le falei’a i le taulaga o Apia.
Na ta’ua e Tessa Viliamu o ananafi poo le lata i le tolu i le vaveao, na aga’i ane ai ma le tuafafine o le tamā o lona toalua e momoli ane i le pasi o vaa lea e usu mai Apia fuafua mo le vaa o le ono mo Salafai.
O le pasi lea e masani ona alu ese ma le taulaga i Apia poo le 4 i le vaveao. E taunuu ane e le o iai se pasi i le vaega e masani ona tu ai.
Sa la taunuu ona paka lea o le taavale i tua tonu o le fale o tina faafeagai tonu ma le maketi o i’a, sa ia iloa atu i le tamai faleie o loo i le ituala i tai, o loo iai se alii, o loo ia ofuina se ofuvae lanu enaena ae faasausau o loo savali atu.
E lei leva ae ona faalogoina se leo o valaau mai tua o le taavale e alu ese lana taavale, e tilotilo atu i le fā’ata o se isi foi alii o loo tofu ona lima ma maa, e lei toe faatali ae faaoso loa lana taavale ma o ese mai lea nofoaga.
Sa faateia o ia i le pa o le maa i lona lima o loo i luga o le faitotoa faatautau i fafo ma fiti mai tau i lalo ifo o lona mata. O loo faaali e lea tina manua nei i luga o lana facebook page.
Sa toe foi loa i le fale ma faamatala i lona toalua ma agai mai loa i le Ofisa o Leoleo.
Na fesiligia e a tatou talafou le Komesina Lagolago ia Papalii Monalisa Keti ae sa ia ta’ua e lei faaulua se tagi a le tina na aafia i lea mataupu, ae ua mae’a nei ona talanoa atu i le vaega o le General Policing ina ia fesootai i le tina na aafia e afio atu e faatalanoa le mataupu lenei.
O le lapataiga a le tina i le atunuu ina ia nofouta i lea tulaga ina ia aua ne’i toe tupu le faalavelave na tupu ia te ia i se isi tagata lea na semanu e telē sona aafiaga pe ana le alu ese vave mai lana taavale mai lea nofoaga.
