Ua mata’itu e le auaunaga a le soifua mālōlōina le faatupula’ia o fanauiti e pesia i āuga o ma’i e pei o le fiva, pata ma papala le tino, faapea le aafia i le tanesusu poo le chickenpox.
O fanau mai le pepe e oo i le 4 tausaga ua aafia ai, ma o le masina na te’a nei o Iulai na amata molimauina ai le alia’e mai o ia uiga ma āuga o ma’i ua aafia ai le fanauiti i le atunuu. Ua faaalia e le soifua mālōlōina ua toe alia’e mai ai ma āuga e fesoota’i i faama’i e aafia ai lima, vae ma le gutu poo le hands, feet and mouth diseases.
Ua faatino ai se sailiiliga a le matagaluega i le toe aliali ma o ia faama’i aemaise le aafia ai o tamaiti laiti. O le tanesusu e mafai ona pipisi ona o se vairusi e mafua ai, ma o le fautuaga lea a le soifua mālōlōina i mātua o le mata’itu lelei o fanau ma ia vave ona vaai se foma’i mo le faia o togafitiga. Ua faailoa lea tulaga e le matagaluega o le soifua mālōlōina, a o faamalosia ai pea fautuaga o puipuiga o le faama’i korona vairusi poo le Koviti-19.
