Ua lapatai leoleo i tagata Ausetalia ina ia silasila ma le toto’a i faigauo i luga o upega tafailagi ia mautinoa e le o taulai mai faiga a le autaufaasese ia i latou i le aga atu i le Kirisimasi. 

Ua tuuina e leoleo se lisi ua faaigoa o le list of red flags e ao ona silasila iai tagata ina ia faamanatu ai pea ia i latou ia mataala i tulaga faapea o faigauo i luga upega tafailagi. 

Ua faia mai lea fautuaga ina ua mae’a ona suesue le mataupu e faatatau i teugatupe faasoliulafono sa aafia ai nisi o tagata Ausetalia e toa 15.

Fai mai leoleo o le ausolitulafono e eseese uma vaega ua agai mai ai ma o se tasi o faiga taatele o le talosaga mai lea e transfer atu se tupe i se tusitupe mo se fesoasoani mo ia.

O isi ituaiga taufaasese fou ua a’e mai nei e foliga e umi se taimi e faamasani ai ma le tagata ona faatoa faasau loa lea o faiga taufaasese pe a ua umi ona mafuta i luga lava o fesootaiga i le social media.

Faamanatu mulimuli a leoleo afai ua tuai ona silasila i le fautuaga lea ma ua mae’a ma’umau tupe i nei faiga taufaasese, ia vave vili loa le Report Cyber pe vave fesootai i le faletupe e puipui lau tusitupe mai le toe aveese o nisi tupe faaopopo.