Ua lalata mai i Samoa le malaga a le vaaleoleo fou o le MV Nafanua III, lea ua faamoemoe o le faaiuga o lenei vaiaso e tuta ai i le uafu tele i Apia, i se malaga ua silia ma le masina talu ona tuua ogasami o Ausetalia, ma folau mai ai i lo tatou atunuu.
Ua faailoa i se tusitusiga i le upega tafailagi a le vaega o le puipuiga a le Malo o Ausetalia i le Pasefika, o le toe faaleleia o le ofisa o le vaaleoleo i le nofoaga i le uafu tele i Apia, ua talafeagai lelei lona faaaogāina ma le taunuu o le Nafanua III.
O le Aso Lua o le vaiaso nei na afea ai e le vaaleoleo le atunuu o Vanuatu mo le utuina a o lei faaauau mai i Samoa lana malaga.
O le 18 ai lea o vaaleoleo ua faameaalofa e le Malo o Ausetalia i lana polokalame o le puipuiga o loo galulue soosoo tau’au ai ma le Malo o Niu Sila.
O le vaiaso asau ua fuafua e faia ai se sauniga faapitoa e aloaia ai le to’ai taunuu o le Nafanua III, o le tolu ai lea o vaaleoleo ua maua e Samoa i le agalelei o le Malo o Ausetalia.
