Ua galulue faapaaga le Pasefika Family Health Group, le EFKS Puaseisei i Magele ma le Iunivesite a Otago, ina ia amatamea i se galuega e faamautu i le nofoaga a le ekalesia, auā le fesoasoani atu ma le tausia o le itu tau le soifua maloloina ma le soifua manuia o tagata o le komiuniti i Aukilani i Saute.
O le nofoaga o le Ekalesa EFKS Puaseisei i Magele i Sasa’e lea ua faatulaga ai le Puaseisei Health Centre, ma e faaaogā ai foi fesoota’iga i satelite, ma o le a faafaigofie ai ona maua e tagata Pasefika uma o loo lalata atu iai, fesoasoani ma fautuaga tau le soifua maloloina.
O lenei foi nofoaga o le a maua ai e tamaiti aoga a le Pasefika o loo a’otauina i mataupu faafomai i le iunivesite a Otago ni avanoa e agai mai ma faatino ni latou galuega e faamasani ai foi ma atili faaleleia ai o latou tomai i galuega faafomai ma faatausi soifua.
O lenei faama’ite e tai faatusa atu i Samoa i afioaga ma nuu i tua o loo faatulaga ai Fale Komiti, o iina e iai se fale poo se nofoaga e i totonu o le afioaga e faatino uma ai auaunaga mo le tausia o le soifua maloloina.
O lea nofoaga o le a agai iai tagata o le ekalesia ma soo se tasi e moomia, mo le faia o latou tuipuipui, o tina ma’itaga mo a latou siaki ma nisi fesoasoani moomia i taimi o ma’itaga, e faatino ai foi auaunaga a le Well Child Tamariki Ora, o a’oa’oga faalesoifua maloloina, le faia o siaki o le taufale (bowel screening) ma le siaki o le HPV.
Saunoa le faletua ia Galumalemana Vaifagaloa Naseri, o le tamaitai Pule o le Pasefika Family Health Group, o lenei nofoaga tutotonu o se uluai nofoaga faapea ua faatulaga i totonu o Aotearoa.
“O le mea sa masani ai, e agai atu le vaega o fomai a le Pasefika i aulotu ma faalapotopotoga a le komiuniti e faatino ai a latou auaunaga e pei o le faiga o tuipuipui, peitai la o lea ua matuā ese mai le faiga lenei, ua faamautu lelei lava le nofoaga ua atoa i ai galuega mo le tausiga o le soifua maloloina ae o lea ua faatulaga i le nofoaga o le ekalesia.
O le a iai se tasi i totonu o le aulotu e galue o se Pacific health navigator, o ia lea e avanoa e faatalanoa tagata i le tausiga o latou soifua maloloina, o ia foi la lea na te faatulagaina taimi mo nei tagata e vaai ai fomai e fua i o latou manaoga, lona uiga o ia e galue ina ia iai le fesootaiga lea i le va o tagata o le ekalesia ma auaunaga a le Pasefika Family Health Group.
Na saunoa Galumalemana Vai, o le a taumafai le tagata lea e ta’ua o le navigator e faamasani atu i tulaga o tagata taitoatasi ma aiga i totonu o le latou aulotu ma soo se tagata lautele, ina ia latou silafia nisi o auaunaga ma soo se fesoasoani e maua, ma ia faamalamalama i tagata vaega uma o le soifua maloloina e tatau ona latou iloa ma latou moomia ona maua mo le tausiga o latou soifua maloloina, aemaise ai la ia latou iloa le auala e maua ai nei auaunaga fesoasoani.
O se faataitaiga, afai e iai ni pepe fou ua fananau mai i totonu o le ekalesia, o le a talanoa atu le navigator i aiga o nei pepe fou ina ia faamautinoa le soifua manuia o nei pepe ma o latou mātua, ma ia faamautinoa o faatino uma siaki e moomia mo le tausia a’e o nei pepe.
Afai foi e lei lesitalaina nei pepe fou mo le mauaina o auaunaga e pei o le Well Child, e mafai ona matou faatulaga se matou tausi soifua o le Well Child ina ia oo atu i le ekalesia mo le lesitalaina o na pepe.
Na ta’ua foi e Galumalemana o loo fuafua lo latou faatalanoaina o le mataupu i siaki o le HPV i vaega o tina ma tamaitai i totonu o le ekalesia.
O le a faatulaga ni talanoaga e fai i se aoauli o se Aso Sa mo le talanoaina o faamatalaga, ina ia mafai ona oo atu iai tina ma tamaitai ma faatalanoa ai faatasi ma le navigator le faagasologa o lea siaki, ma o le a faatulaga foi ni clinic i le nofoaga o le ekalesia a o faagasolo le vaiaso, ina ia oo atu tina ma nonofo e inu se iputi a o faasolosolo taitoatasi i totonu e fai le siaki.
O le faamoemoe autu lena o lenei faama’ite fou e pei ona saunoa Galumalemana, e lē gata ina mafai ona taimua ai tagata lautele ma latou faaaogāina, ae ia atili faaleleia ai foi sootaga ma faiā lelei a tagata lautele, ma saunia ai manaoga o tatou tagata i ni nofoaga o loo faigofie ona to’afilemu ai o latou lagona a o agai atu i ai mo fesoasoani i le tausiga o latou soifua maloloina.
