O le Minisita o le Soifua Maloloina le afioga Valasi Luapitofanua Toogamaga Tafito Selesele, ma le afioga Aupito Su’a William Sio, sa avea ma faipule ma Minisita o le Malo o Niu Sila na taulamua i le sailiga o le lagolago o se tagatanuu mai se Malo o le Pasefika ua manumalo i le sailiga o se faauluuluga o le ofisa o le soifua maloloina o le lalolagi mo atunuu Asia ma le Pasefika.
O le Minisita o le soifua maloloina o le tatou atunuu sa usufono i le fonotaga a atunuu o loo i lenei faaitulagi o loo i le lio o malo o loo vaaia e lea ofisa o le soifua maloloina o le lalolagi.
Sa malaga o ia faatasi ai ma le Faatonu Sili Aoao o le soifua maloloina.
I se pepa faalauiloa ua ta’ua ai o se matati’a muamua lea i le talafaasolopito o le faalapotopotoga o le soifua maloloina o le lalolagi o le filifilia o se tagata mai le Pasefika e taiulu i le pulega o ana galuega mo atunuu Asia ma le Pasefika e pei ona seei ai se tasi mai le atunuu tuaoi o Tonga o se fomai ae sa avea foi ma minisita o le soifua maloloina o lea Malo mo le iva tausaga, Honorable Dr Saia Ma’u Piukala.
Faaalia e le afioga Valasi i le pepa faalauiloa mai Manilla le laumua o le atunuu o Filipaina sa usuia ai lea fonotaga, o le manumalo o se tasi mai le Pasefika o se tala ave ma se tala faamauina mo le agai i le lumanai aemaise o le talafaasolopito o le faalapotopotoga o le soifua maloloina a le lalolagi.
Ua avea nei lea tagatanuu o Tonga ma Faatonu o le ofisa o le WHO mo atunuu Asia ma le Pasefika ma ua faailoa e le minisita o le soifua maloloina o le tatou atunuu, ua siitia nei fesoasoani tau tupe mo atunuu o lenei faaitulagi i le 20 pasene ma o Samoa le isi atunuu o le a faamanuiaina ai.
