I le lipotia ai o le iai o se fuafuaga a le Palemia o le Malo o Solomona e le talia vave e lona Malo se fuafuaga mo atunuu o le Pasefika ua folafola mai e le Malo tele o Amerika, ua faailoa e le tamaitai Palemia o Samoa le afioga Fiame Naomi Mataafa, i se talanoaga ma le leitio a Ausetalia, o le a talia e Samoa lea fuafuaga e patino lava i gaioiga e faasaoina ai lo tatou paneta mai suiga tetele o le tau.
O se mataupu lea o loo laualuga i fuafuaga a Malo o le Pasefika, ma ua tele tausaga o finau ai taitai o atunuu laiti o lenei faaitulagi, e pei ona saunoa le Palemia o Samoa i lea auala o faasalalauga.
I lea lipoti ua faailoa ai e le tamaitai Palemia, o se fuafuaga i le itu tau puipuiga e lotolotoi ai le Malo o Amerika o se mataupu e le mafai ona talia e Samoa pe afai o se fuafuaga e faateleina ai se malosi faafitafita o le Iunaite setete i totonu o le Pasefika, e mafua ona o le puipuiga, o se isi o mataupu ua taoto iai nisi o fuafuaga a taitai e ala i feagaiga faavaomalo.
E pei ona silafia o vevesi sa aafia ai se vaega o tagata o le atunuu o Solomona i ni tausaga ua tuanai, sa fausia ai se maliega a malo laiti o le Pasefika faatasi ai ma Malo o Ausetalia ma Niu Sila, e auina atu leoleo ma fitafita mai atunuu o le lio o lea taupulega, e faato’a filemu ia vevesi ma mataitu le puipuiga o le soifua o tagata o lea atunuu tuaoi.
O le faaiuga o lenei vaiaso o loo feiloai ai le Peresetene o Amerika ia Joe Biden ma taitai o le Pasefika, lea o le a folasia ai ma le fuafuaga a lea Malo i se taumafaiga e galulue faatasi ai ma Malo o lenei itu o le lalolagi.
