O le lagona o le susuga i le faiaoga a le Manu Samoa le afioga ia Vaovasamanaia Seilala Mapusua, e fia manaomia ni taaloga a le Manu Samoa ma nisi o ‘au lelei o loo numera tasi i le lalolagi e pei All Blacks, Egelani, Ireland ma isi ‘au o loo iai i le Tier One e alualu ai i luma le finau o tama taalo, peitai ina ua mae’a le Ipu o le Lalolagi i le tausaga nei ae sau loa i tua le polokalame fou a le  world rugby i vaega e tatau ona iai aulakapi a atunuu taitasi ma o lea sa lagolagoina ai loa e le afioga ia Faleomavaega Vincent Fepuleai ma le iuni lakapi a Samoa lea polokalame. 

Na faamanino e Faleomavaega Vincent Fepuleai, le mafuaga o le lagolagoina e le iuni lakapi a Samoa lea polokalme, ona e lē fou lea mataupu, ina ua mae’a le Ipu o le Lalolagi i Iapani i le 2019 sa talatalanoa le pulega o le Ipu o le Lalolagi ma iuni taitasi i auala e agai ai i luma le taaloga.

Ona ua iai le lagona o le pulega o le lakapi e tatau ona ave avanoa tutusa ma le lakapi a tamaitai.

O le World Rugby e tasi lava le latou vaega tupe e sau i totonu i le fā tausaga na o le Ipu o le Lalolagi, o seleni uma ma polofiti e maua mai i le Ipu a le Lalolagi o iina lea e faasoa uma lava i iuni taitasi ma atinae ai taaloga.

O le tilotilo a le lakapi a le lalolagi i le taimi nei i ‘au a le lalolagi ua tele ina lelei lona atinaeina.

Ma o le tausaga 1996 na faapolofesa ai le taaloga lenei o le lakapi, o lona uiga o le tulaga atoa ua iai le taaloga i le taimi nei o le pisinisi.

E lua tausaga o faatalanoa le mataupu ma o le afioga ia Faleomavaega Vincent Fepueai sa fai ma sui o Samoa i ia fonotaga. 

E tele ni vaega e lē mafai ona ausia e le iuni lakapi a Samoa sa taumafai lea e tuuina atu i le tulaga faapisinisi o le taaloga, ae mo le silafia o Samoa e lē o se atunuu tele e laititi foi lona tamaoaiga, e tele vaega e tilotilo iai le iuni lakapi pe a oo ina masii atu ni ‘au i Samoa, e pei o malaetaalo, faletalimalo aemaise o le falemai, ma e manaomia foi fomai pe a malaga le ‘au i fafo.

O le taimi nei ua faigata ona saili ni ‘au e taalo ma le Manu Samoa poo ni ‘au foi mai Niu Sila, auā e tatau ona totogi e le iuni lakapi a Samoa inisiua a ‘au nei.

E silia ma le selau afe Niu Sila le inisiua e tatau ona totogi mo ‘au uma, ma e talu mai ona faapolofesa le taaloga ma tuufaatasia le ‘au a le atunuu e lē gafatia e le iuni lakapi a Samoa ona totogi ia tupe tetele.

O lea foi ua toe faaopoopo ma ‘au a tamaitai ma ua atili toe faaopoopo mai ai ma tau o isi mea i luga.

E telē le tupe o loo maua mai e le pulega a le lakapi a le lalolagi e siitia ai le tulaga o tapenaga o taaloga ma faatupe ai pe a masii le ‘au, peitai e lē taitai lava ai le faasoa i tupe maua ia e maua mai mo le iuni aemaise lava tausaga o le Ipu a le Lalolagi.

Talu mai ona amata ona faafoe le iuni lakapi a Samoa mai le amataga e leai ni aseta o iai na o le tasi lava le aseta o tama taaalo.

Lea faatoa uma atu le Ipu a le Lalolagi o le tupe lava e tilotilo iai e ova atu ma le fā miliona tala Samoa e faatino ai malaga, e 50% e faatino e le lakapi a le lalolagi ae o le isi 50% e sailia e le iuni lakapi, ae ana leai le fesoasoani malosi a tatou lava kamupani i totonu o Samoa ma faalapotopotoga a le malo e lē mafai ona iai se Manu Samoa ma o le tala moni lea ma le tala sa’o auā e lē taugofie mea ia e tapena iai le Manu Samoa.