O le vaiaso na tea nei na amata mea ai e Minisita o le Kapeneta i le inumia lea o fualaau o le mūmū tutupa e pei ona faasavaloa nei e le Matagaluega o le Soifua Maloloina.
O le Aso Toonai lea na faagasolo ai loa lenei fuafuaga i nuu ma afioaga e ala lea i le afea o aiga taitasi e sui ua mae’a ona aoaoina i le faatinoina o lenei matafaioi faatasi ai ma tausi soifua ina ia mautinoa e maua uma atu le aiga e faainu fualaau.
I pepa o faamatalaga o loo ta’ua ai o le faama’i o le mūmū tutupa e lē o se faama’i e fou ma ua tausagā le iai pea o lea faama’i i totonu o Samoa.
O le mūmū tutupa o se faama’i e feaveaia e namu.
E aafia le tagata pe afai e ū e se namu, ua aafia i anufe o le mūmū tutupa.
E ulufia e anufe itu tino o tagata ona sosolo lea i alatoto ma nonofo ma fanafanau ai.
O le mafuaaga lena e poloka ai alatoto, ma afua ai āuga o le mūmū tutupa e pei o le fiva ma le fulafula o itutino.
I le saunoaga a le Faatonu Sili Aoao o le Soifua Maloloina ia Aiono Dr. Alec Ekeroma e uiga i lenei faama’i.
“O le lu’itau o lenei faama’i, e faigata lava ona iloa ni āuga se’i vagana lava ua oo i ni ooooga tūgā.”
O le naunautaiga a le Matagaluega o le Soifua Maloloina ma ana paaga galulue ina ia unaia uma ē agavaa e inu fualaau o le mūmū tutupa ina ia faaitiitia anufe o le mūmū tutupa (intestinal parasites) mo i latou ua aafia ma faatama’ia ai anufe pepe o le mūmū tutupa o loo ola ma fanafanau i alatoto o tagata soifua.
Afai ae faatama’ia anufe o le mūmū tutupa, o le a fesoasoani foi e faaititia le pipisi o lenei faama’i o loo feavea’ia e namu.
O le lua ai nei o faainuga fualaau, ua faaaogāina ai ituaiga Fualaau e tolu o le faamai o le mūmū tutupa e pei ona iai ta’iala aloaia a le Faalapotopotoga o le Soifua Maloloina o le Lalolagi (Triple Drug regimen recommended by WHO for the treatment of Lymphatic Filarisis).
O lenei faainuga fualaau e agavaa ai i latou e amata mai i le 2 tausaga seia oo atu i le au matutua e lē mafai ona inuina e fanau faatoa fananau mai seia oo i le 23 masina le matutua, o tina ma’itaga ma failele e lei atoa le 7 aso o lana pepe faapea ai ma gasegase tigaina i le maota gasegase ma tua i aiga.
O le faatupeina ma le faatotogaina o lenei faamoemoe tele, o loo lagolagoina e le Malo o Samoa faatasi ma paaga e mautinoa ai le malupuipuia o Samoa ma ona tagata mai lenei faama’i auā e sili lava le puipuia nai lo le tau togafitia.
