O Ma’auga Divine Paselika Semiti poo Ma’auga Semeti o se tama tane ua 21 tausaga lona matua ua fa’asala e le fa’amasinoga i le 6 masina i le falepuipui, ina ua ia ioeina moliaga o le umia o la’au faasāina o le maruana ma le ‘aisa, fa’apea lona umia o se paipa ma se straw e fa’aaoga i fuala’au fa’asāina.

O Mati o le tausaga nei a’o sauni leoleo i se latou osofaiga e sa’ili ai nakoti, ae maua le vala’au mai le Pulega o Felaua’iga i le Laueleele i se tagata o loo i totonu o lana ta’avale ae o loo masalomia o loo iai ma ni la’au faasāina.

Na fa’avave iai le galuega a leoleo ma sa’ili le ta’avale ma toe faia ma sā’iliga i le fale o lē ua nofosala ma maua ai lau maruana, o fatu o le la’au faasāina, o se paipa, straw, ma se taga pepa ‘i’ila lā’ititi sa iai ni pauta fa’asāina o le ‘aisa.

O lē ua nofosala i solitulafono tau fuala’au fa’asāina e lua tausaga sa galue ai i Niu Sila i galuega fa’avaitaimi.