Ua sefulufitu nei tausaga talu ona tuana’i le tsunami poo le galulolo na fano ai soifua o nisi o le nu’u tulata ile sami o Saleapaga, ae fa’atama’ia le tele o a latou meatōtino e pei o maota ma laoa. O le mafuaaga lea na si’itia atu ai le tele o aiga o le nu’u ma fa’amautū i o latou eleele tu uta i luga o le mauga, ae sa feagai ai ma se tasi o lu’itau o le lē lelei o le tulaga i le suāvai taumafa e maua ma fa’aaoga i isi fuafuaga masani.

O tane vai sa fa’alagolago iai le nu’u ona e fa’alētonu foi le ‘ofe paipa e maua atu ai le suāvai. O le Aso Lua o le vaiaso nei na maua ai se isi fesoasoani tāua o le vai e puna mai le manava o le ‘ele’ele ua mae’a ona fa’asimā ma fausia lelei le fale e malu ai, ma ua umusā, o se isi fa’amāmā avega lea i le maua ai pea o le suāvai i aso uma.

O le faaleleia o le vaipuna o le nu’u sa fa’atupe i seleni mai le poloketi miliona a le malo ma o le fa’afetai lea a le Fa’afeagaiga o le Ekalesia Faapotopotoga Kerisiano i Samoa i Saleapaga i le ta’ita’i o le malo sa auai i le umusaina o le galuega o le vai.

O se vaega o le sunoaga a le Fa’afeagaiga susuga, Ualesi Isaraelu ma le ta’ita’i o le malo le afioga i le palemia susuga Laaulialemalietoa Leuatea Polataivao Fosi Schmidt. 

Le Faifeau EFKS o Saleapaga ma le afioga i le Palemia i le sauniga na umusā ai le galuega o le vaipuna o le nu’u o Saleapaga o se tasi o afioaga o le itumalo palota o Lepa.