Ua agai nei Alii ma Faipule o le afioaga o Lalomauga e fai ma avefeau o le tetee atu i sauaga faasaga i tina ma tamaitai.
O lenei faaiuga na faia a o faagasolo ai aoaoga mo aso e lua o se vaega o fuafuaga a le malo i lalo o le faalapotopotoga a le Toomaga mo ē Puapuagatia le SVSG.
Faailoa e taitai o le afioaga le tāua o lea aoaoga ua maua ai avanoa mo tina faapea taulelea e fefaasoaa’i ma taumafai e tuufaatasia se taiala mo le nuu atoa e ala i le tetee atu i nei sauaga.
Ta’ua e sui o le Toomaga mo ē Puapuagatia o se vaaiga matagofie na molimauina i aso e lua na faagasolo ai le polokalame i le naunau ma le finafinau o sui auai a le afioaga ina ia faataunuu lenei faamoemoe tāua.
Na faafetaia ai foi e le afioaga le malo mo lenei polokalame faaauau auā lava le saogalemu ma le malu o tina ma tamaitai i totonu o latou aiga, nuu faapea ekalesia.
