O le itumalo faapalota o Anoamaa Numera Tasi o lo latou tofi i le Palemene o loo i le Itu agai, ae ua latou lagolagoina ma le atoatoa taumafaiga uma a le Malo mo le atina’e manuia o tagata ma le atunuu.

O le faaiuga o le vaiaso na tea nei mo le taimi muamua, na faatino ai le uluai seleselega a le itumalo sa molimauina e lo latou tofi faipule le afioga Alai’asa Sepulona Moananu ma le Minisita o Faatoaga ma Faigafaiva le susuga Laauli Leuatea Polataivao Fosi Schmidt, faapea le paia maualuga o le itumalo aemaise o faletua ma tausi, ma le malosi o le itumalo.

Na momoli ai le faafetai ma le faamalo a le Minisita i le sui faipule ona o le tulaga lelei o loo iai atina’e tau faatoaga ma lafumanu a Anoamaa Numera Tasi, o se vaaiga ua molimauina ai se taitaiga lelei ua taulamua ai le sui faipule.

Na saunoa ai foi le faipule ma faafetaia le minisita ma le faigamalo i le lagalaga i taumafaiga e siitia ai le tamaoaiga o nuu ma itumalo i faatoaga ma faigafaiva faapea lafumanu, aemaise le poloketi tasi le miliona tala mo itumalo faapalota taitasi o le atunuu.

E sefulu afe tala le tau o meafaigaluega tau faatoaga faapea fatu laau na faameaalofa e le minisita ma lana matagaluega i le aufaifaatoaga a Anoamaa Numera Tasi.

O se tasi lea o uluai seleselega ua faatino i le amataga o lenei tausaga fou.